Зохиолч: Амрита Притам
Орчуулагч: С. Пүрэвжав
Ангилал: Энэтхэг зохиол
Хэвлэлийн газар: Улсын хэвлэлийн газар
Харин Туни:
— Ноёнтон та надтай суух уу? гэж асуулаа. Тэр үгийг сонсоод миний зүрх догдоллоо.
Би нэг удаа «Чи яг л бутны орой дээрх навчнууд шиг булбарай ариухан хүн юм. Ийм гайхамшигтай цайтай шаазангаас ямар хүн уудаг юм бол доо?» гэж түүнд хэлж билээ. Ийм хувь заяатай хүн нь би болох нь гэж үү? Би энэ тухай огт бодоогүй байлаа. Би ямар ч хорон муу санаа саналгүй зүгээр л чамд мөнгө өгөх гэсэн юм гэж Тунид батлан хэлэх гэж бодтол Туни надаас урьтаж:
— Ноёнтон минь! Би хувь заяа минь өршөөг гэж найдаж болохгүй гэж үү? хэмээн гунигтайгаар өгүүлэв.
Амьдрал намайг эрхлүүлээгүй, намайг хувь заяатай хүн гэж хэлэх аргагүй билээ гэдгээ би танд хэлэхээс өөр арга алга. Би хэд хэдэн эмэгтэйг мэдэх боловч бидний зам төдий л удаан нийлж чадаагүй, бид доорхноо тал тал тийшээ салж, би ганцаараа үлддэг байсан юм. Амьдралын турш миний хань болох ямар нэг хүн олдоно гэсэн найдвараа би бүр алдчихаад байсан юм.
— Чи надтай амьдрахад их хэцүү болно Туни. Би бол уусан хүн болгоны амыг түлдэг буцламгай халуун ус гэсэн үг гэж би хэллээ.
