Зохиолч: Гүи Де Мопассан
Орчуулагч: Д. Лодойдамба
Ангилал: Францын уран зохиол
Хэвлэлийн газар: УЛСЫН ХЭВЛЭЛИЙН ХЭРЭГ ЭРХЛЭХ ХОРОО
Үнхэлцэг бөхийж, урт сандал дороос цагаан алчуураар бүтээсэн сагс татаж гаргав.
Тэр хүүхэн сагс дотроосоо эхлээд жижиг шаазан таваг, мөнгөн хундага хоёр гаргаж ирснээ дараа нь савханд хэрчиж хийгээд царцмагтуулсан тахианы хоёр дэгдээхэй гаргав. Цаана нь бас тэр сагсанд хуушуур, жимс зэрэг гуанздалгүйгээр гурав хоног идэж хүрэхээр бэлтгэсэн цаасанд боодолтой амттан тэргүүтэн харагдаж байв. Боодолтой идэх юмсын завсраар дөрвөн шилний ам цухуйна. Үнхэлцэг өнөөх царцмаг дэгдээхэйтэй савхныхаа тагийг авч, норманд нутагт «режанс» гэж хэрчсэн талхтай холиод тавтайхан идэж гарлаа.
Хүмүүсийн бүх хараа түүн дээр тусжээ. Удалгүй сүйх тэргэн дотор хоолны сайхан үнэр таран, хүмүүсийн хамар цоргиж, арааны шүлсийг гоожуулж эхлэв. «Тэр хүүхнийг» жигшин зэвүүцэх нь улам ихэд нэмэгдэн, хундага, сагс, идэх юмтай нь хамт сүйх тэрэгнээс гаргаж цасан дотор хаях буюу алж тонилгох гэсэн зэрлэг бодол төрж байжээ...
