Германчуудыг өчигдрийн дэлбэрэлт айлгасан юм уу, аль нэг юманд бэлтгэж байсан юм уу өнөөдөр ердийнхөөсөө илүү үймж бужигнав. Тересполийн хаалганы хавийн газрыг цэвэрлэх ажил хийн, хаа сайгүй хүч нэмэгдүүлсэн харуул холхин, Плужниковын харж залхсан олзлогдогсод үзэгдэж харагдах ч үгүй, дуу чимээ нь сонстох ч үгүй байлаа. Гурван нуман хаалганы тэнд ч бас юу юм нэг зүйл хийх нь тэндээс моторын дуу сонстох тул Плужников цайзын баруун Хойд хэсэг рүү нэвтрэх, тэр хавиар Мухавец голыг гатлан, гадна талын хүрээг нэвтэрч болох эсэхийг үзэхээр шийдэв.

Плужниковт азаа үзэх эрх байсангүй, тийм учраас ил задгай газар гарахаас зайлсхийн хянуур явлаа. Тэр байтугай харуул харагдахгүй байсан ч зарим газар мөлхөв. Өнөөдөр буудалцах, зугтахыг хүссэнгүй. Шөнө нь түүгээр явж болохуйц ангал байгаа эсэхийг л өнөөдөр олж үзэхийг хүсжээ. Цайзаас мултран гарч, анх дайралдсан хүмүүс дээр очиж, тэдэнд хүүхнийг орхихыг боджээ.

Чухам юу болдог байлаа ч гэсэн тэгээрэй гэж ахлагч гэрээслэн захисан нь эгээн зөв байсныг Плужников сайтар ойлгож өөрөөсөө шалтгаалах бүхнийг хийлээ. Гэхдээ гав ганцаархнаа үлдэх үеийн тухай бодохоос ч битүүдээ эмээнэ. Онги татагдан эвдэрч хэмхэрсэн цайзад орь ганцаараа үлдэхээс бас айна. Мирратай цуг явж, энгийн хүний хувцас олж өмсөөд, ой руу сэм одохыг оролдоод үзэж болох л байлаа. Ангиасаа тасарсан Улаан Армийн байлдагч, дарга нар тэнд үлдсэн нь бараг лавтай байв. Ингэж ой руу очих нь зугтсан хэрэг ч, тушаалаас урвасан хэрэг ч болохгүй байсан буй заа. Учир нь өөрийнх нь нэр ямар ч бүртгэлд ороогүй, чөлөөтэй хүн байлаа. Гэтэл чухамдаа энэ чөлөөтэй сул байдал нь цэрэг дайны үүднээс хамгийн зохистой шийдвэрийг бие даан гаргах хэрэгтэй болгожээ. Тэгвэл цэрэг дайны үүднээс хамгийн зохистой нь сум хэрэгсэл, идэх уух юм, толгой хоргодох байр байсан цайздаа үлдээд байлдаж болох байв. Бас үл мэдэх ойгоор зугтахын хэрэг байсангүй...