Зохиолч: Юрий Нагибин
Орчуулагч: Ж. Лхагва
Ангилал: Оросын уран зохиол
Хэвлэлийн газар: БНМАУ-ын Ардын боловсролын яамны хэвлэл
Намайг намхан хайстай зэрэгцэн очиход нэгэн банз хажуу тийшээ хөдөлж, завсраар нь өвс бутанд сараачуулсан цагаан зураастай жижигхэн хөл, дараа нь тогоочийнх шиг өндөр цагаан малгай, халтар хултархан бор гар, бүр сүүлд нь миний хуучин танил Комаровын бүх бие гарч ирэв. Тэр бээр ийш тийшээ харж миний зүг сэрэмжлэн ширтэхэд нь би эс мэдсэн дүр үзүүлэв. Мань эр зайлуулсан банзаа байранд нь эвтэйхэн тавиад баяртай цолгин инээд алдлаа. Комаров оргож яваа гэдэг нь хэнд ч мэдээж байлаа.
Комаровыг би хөтөлж аваачаад хүмүүжүүлэгчид нь тушаачхаж болох байсан боловч тэгсэнгүй. Юу гэвэл нэгдүгээрт энэ гудамжаар унаа хөсөг явдаггүй, хоёрдугаарт би дэргэд нь байгаа болохоор айж эмээх зүйл түүнд үгүй. Мэдээж, хүмүүжүүлэгч нь нэг хэсэгтээ сандарна л биз. Гэхдээ ... тэгвэл ч тэгэг гэж би бодов...
