Манай оронд мод хэдийний шарлаад анхны цас хаялж байдаг 9-р сарын эцсээр, Болгар оронд бороо орж мод шал ногооноороо, эгээ л манай эндхийн зун шиг дулаан байх юм. Хоёр талаар тарьсан навчит ногоон модны эгнээ ярайгаад тамхи, усан үзэм, эрдэнэ шиш, элдэв гуаны таримлууд халиуран ногоорч байгаа тэгш сайхан зүймэл чулуун замаар бид явлаа.
Ингэж явсаар цэлэлзсэн ногоовтор устай нуурын хөвөөн дээр ирлээ. Энэ нуур бол түрүүчийн гарсан газар зүйн зураг дээр тэмдэглэгдэж амжаагүй, хүний гараар бүтээгдсэн цоо шинэхэн нуур юм.
Өргөнөөрөө 5 метр, гүйхэн устай нэг жижиг гол хөндийгөөр урсан өнгөрдөг байжээ...
