1957 оныг би хэзээ ч мартахгүй!
Мөн оны эхээр юм сан, улсын номын сангийн 106 дугаар танхимд зохиолчдын хурал болоход, тэр хурал дээр үг хэлсэн хүмүүсийн дунд Сэнгээгийн гүтгэлэгт өртсөн хүмүүсийн нэгд би гэдэг хүн орж, «Үнэн» сонинд хүртэл Тарва зохиолчоор шүүмжлүүлж байсан. Надтай хамт тийнхүү өртсөн хүний нэг бол Ш. Гаадамба байлаа. Бид хоёрын хэлсэн үгийг Сэнгээ овжин мушгин гуйвуулж Намын Төв Хорооны бүгд хуралд үзэл суртлын асуудлыг хэлэлцэхэд баримт болгон оруулж «Сэхээтний төөрөгдөл» хэмээгчийн төлөөлөгч болгон гаргав...
