ДЕКАМЕРОНЫ ГУРАВ ДАХЬ ӨДӨР ДУУСАЖ ДӨРӨВ ДЭХ ӨДӨР ЭХЭЛЖ БАЙНА

НЭГ : Салерны засаг ноён өөрийн охины амрагийг алаад зүрхийг нь алтан аяганд хийж охиндоо хүргүүлэв. Охин нь амрагийнхаа зүрхний дээрээс хортой ус хийж уугаад насан эцэслэв.

ХОЁР : Альберт гэлэн нэгэн хүүхнийг түүнд Гавриил тэнгэр дурласан хэмээн итгүүлж, өөрөө тэнгэрийн дүрээр тэр хүүхэнтэй хэдэн шөнийг хамт өнгөрүүлжээ. Нэгэн шөнө гэлэн хүүхний төрөл саднаас айхдаа цонхоор нь гарч, нэгэн ядуу хүний гэрт толгой хоргодов. Маргааш нь тэр ядуу хүн гэлэнг зэрлэг хүний байдлаар хувцаслан хотын талбайд авч очсонд хүмүүс гэлэнг таниад даруй баривчлан шоронд хийжээ.

ГУРАВ : Гурван залуу эр эгч дүү гурван бүсгүйд дурлаж, тэднийгээ босгон Крит аралд оргож очив. Их эгч нь жөтөөрхөн өөрийн амрагийг алж, дунд эгч нь Критийн бэйлд хэвтэж өгснөөр эгчийгээ цаазаар аваачих ялаас хэлтрүүлэв. Гэтэл түүнийг өөрийн нь амраг алж, эгчтэй нь хамт оргон зайлав. Дунд эгчийгээ алсан хэрэгт дүү бүсгүй, түүний амраг хоёр холбогдон хоёул баривчлагдаад уг хилс хэргийг хүлээцгээв. Дараа нь цаазаар авхуулахаас айж харуулын хүнд хахууль өгч Родост оргон очоод тэндээ үгээгүй ядуугийн туйлд хүрч насан эцэслэцгээсэн гэнэ.

ДӨРӨВ : Жербино өөрийн өвөг эцэг Вильгельм вангийн өгсөн ам өчгийг зөрчин Тунисийн ван эзний охиныг босгож авахаар хөлөг онгоцыг нь уулгалан довтолсонд далайчид тэр охиныг алж, Жербино далайчдыг алав. Хожим Жербиногийн толгойг хяргаж цаазаар авчээ.

ТАВ : Лизабеттийн ах нар түүний амрагийг алав. Амраг нь бүсгүйн зүүдэнд үзэгдэж, өөрийгөө хаана булсныг хэлжээ. Лизабетта амрагийнхаа толгойг нууцаар малтаж аваад харам цэцэгтэй саванд хийж, өдөр болгон дээрээс нь удтал асгаруулан уйлах болов. Ах нар нь түүнээс амрагийн нь толгойг салгаж авсанд бүсгүй гуньж гутарсаар нэн удалгүй нас баржээ.

ЗУРГАА : Андреола Габриоттод дурлав. Бүсгүй түүнд өөрийн зүүдийг ярьж, залуу эр бүсгүйд өөрийн зүүдийг яриад төдхөн өвөрт нь нас баржээ. Бүсгүй өөрийн шивэгчинтэй хамт үхдэл Габриоттог гэр рүү нь аваачиж явтал эргүүлийн хүн тэр хоёрыг баривчлав. Андреолаг өчиг мэдүүлэг өгсний дараа хотын засаг ноён түүнийг хүчирхийлэхээр завдахад бүсгүй эсэргүүцэв. Бүсгүйн гэм буруугүй нь илэрхий болж, энэ тухай Андреолын эцэг олж мэдээд охиноо суллуулж авлаа. Андреола цаашид нүгэлт хорвоод байхыг үл хүсэхийн учир хийдэд очиж суув.

ДОЛОО : Симона Пасквинод дурлаж, хоёул цэцэрлэгт байж байгаад Пасквино шар-дараар шүдээ арчиж байтал үхэв. Симона баривчлагдаад Паскьиногийн хэрхэн амь үрэгдсэнийг үзүүлэх гэж мөн тэр шар-дарын навчаар шүдээ арчаад бас үхэв.

НАЙМ : Жироламо Сальвестрад дурлав. Залуу эр эхийнхээ хүссэнийг даган Парист очоод эргэж ирэхэд нь Сальвестра өөр хүнтэй суучихсан байжээ. Жироламо нууцаар Сальвестрийн гэрт нэвтрэн орж, түүний дэргэд үхэв. Залуу эрийн цогцсыг сүмд аваачихад Сальвестра бас дэргэд нь үхжээ.

ЕС : Мессер Гвильельмо Россильоне өөрийн эхнэрийн нууц амраг Гвильельмо Гвардастаньог алж, зүрхийг нь эхнэртээ идүүлэв. Эхнэр нь үүнийг мэдээд өндөр цонхоор үсрэн нисэж үхэв. Түүнийг нууц амрагтай нь хамт оршуулав.

АРАВ : Нэгэн их эмчийн эхнэр мэдээ алдуулах эм ууж үхэтхийн унасан нууц амраг юугаан үхэв хэмээн эндүүрч, авдарт хийж гадаа тавьсанд тэр авдрыг доторх хүнтэй нь хамт хоёр мөнгө хүүлэгч хулгайлан аваачжээ. Нөгөө хүнийг ухаан ороход хулгайд сэрдэн баривчлав. Эмчийн эхнэрийн шивэгчин хүүхэн хотын засаг ноёнд тэр хүнийг өөрөө авдарт хийснийг хоёр мөнгө хүүлэгч хулгайлсан байна гэсэн өчиг мэдүүлэг өгчээ. Түүний мэдүүлэг нөгөө нууц амрагийг дүүжлэн цаазаар авах ялаас аварч, хоёр мөнгө хүүлэгчийг авдар хулгайлсны учир мөнгөн торгууль оноон шийтгэжээ.