Зохиолч: Ференц Каринти
Орчуулагч: Б. Дамдин
Ангилал: Унгар уран зохиол
Хэвлэлийн газар: Улсын хэвлэлийн газар
Зоогийн урилга заллага гэж нэг их ёсорхуу зүйл болсонгүй. Хоёр залуугийн тухайд ч гэсэн огт таг чиг байлаа. Профессор тавин найман сүүдэр зэрэгцсэнийг ёслон зоог барих гэж байгааг дэд профессор тэргүүлэн хэн хүнгүй хэдийнээ мэдчихсэн байсан бөгөөд дэд профессор өөрөөс нь гадна профессорын хэзээ язааны сайн анд Асзлан докторыг мөн залсныг мэдэж нэн хөхиүн баясалтай байжээ. Дэд профессор, профессортоо ийнхүү уригдаж, их хайр хүнд хүртсэнийг үгээр яахин илтгэж барах билээ. Профессорын хонгор шар үстэй охин Гитта, дэд профессортой суудал зэрэгцэн суусан байв. Гитта саатай, артай цагаан торгон цамцтай, өргөн перс чисчүү банзал өмссөн нь дэд профессорын нүднээ их л содон харагдана. Тэр залуу дэд профессор болоод дөнгөж аравхан хонож байгаа болохоороо баахан бантаж хөдөлгөөнгүй дүнсийн сууна. Шөл авчрахаас өмнө, хорвоог элэгдтэл хэрсэн нэг өвчтөнөөс профессорт бэлэг барьсан синзано хэмээх дарснаас дор бүрнээ нэг нэг хундага тогтоов...
