«Биеэ засаад гэрээ зас

Гэрээ засаад, төрөө зас»

Эрдэнэт хүний биеийг олно гэдэг энэ хорвоод эрхмийн дээд. Ертөнцийн хамаг сайн сайхан, сонин гайхамшгийг хүн бүтээж, хүн нээж, байгаль дэлхийн гоо бүхний дээр бас нэгэн цогцос «шинэ орчлонг» үүсгэжээ.

Тэрхүү шинэ орчлон хэмээгч хүний гараар бүтсэн орд харш, орон хот, эд агуурс, эдлэл багаж мэт элдэв өлгөөс авхуулаад хүний сэтгэлийн ертөнцийн илэрхийлэл болсон яруу сонсголонт хэл яриа, ёслон дагах зан заншил, уяраан хайлгах ая хөгжим, бахдан баясгах зураг урлал, шидэт үгсийн чуулган болсон уран зохиол бичиг, шастир тэргүүтэн энэ дэлхийг бүчиж эл их гайхамшигт соёлыг идэр хойчистоо уламжлуулан үлдээж, бага залуу үе нь өвлөн авдаг нэгэн эрхэм чанар хүн төрөлхийтнөө буй болжээ. Тийнхүү ахмадынхаа үйл хэрэг, эх түмнийхээ соёлоос суралцаж шинийг бүтээх гэгч нь хүн болсны гавьяа.

Чингэхлээр нь аль ч иргэнийг бага гэж ялгалгүй, эд хүмүүс, ард түмэн мөний учир түүхийг бүтээгч, соёлыг үүсгэгч гэж бод. Үүнчлэн та нарыг төрүүлсэн ард түмэн чинь өөрийг чинь их эрдэмтэй эрхэм сайн хүн болгох гэж чармайж байна. Чи тэр их итгэл найдварыг хөсөрдүүлж яахан болно. Харин чи хүн төрөлхтний бүтээлийг шамдан суралцаж аав, ээж, эрдэмтэн багш, ачит төрийнхөө тусыг хариул. Чиний мэдсэн чинь арвин, үзэж дуулсан чинь их байх тусам чиний үлгэр дуурайл хойч үедээ хамгийн эрхэм үнэтэй зүйл болно. Тийм учраас нам ард түмэн, чи биднийг хүн шиг хүн болгох гэж хүмүүжин саатах газар, сургууль, гэгээрлийн орд байгуулан, эрдэмтэн, зохиолч багш нар чинь үй түмэн ном бичиг гаргаж аав, ээж, ах, эгч нар чинь ертөнцийн нэг хурамд ч гэсэн хасадхийлгүй хүн төрөлхтний ирээдүй болсон та нарынхаа төлөө зовж, баясаж суудаг билээ.

Ийм учраас та бидэнд ардынхаа заншил, соёлыг мэдэхээс илүү эрхэм ёсон хаа байх билээ.