Зохиолч: Х. Пэрлээ
Орчуулагч:
Ангилал: Монголын уран зохиол Замын тэмдэглэл газарзүй
Хэвлэлийн газар:
1943 оны 5-р сарын 17-ны өдөр Улсын нийслэл Улаанбаатар хотын дээгүүр борооны бараан үүл бүрхэж алсын ямар нэгэн зүгт гарсан түймрийн утаа хэдхэн километрийн тэртээгээр торгомсог цэнхэр хөшиг мэт тойрон хүдэнтээд бас борооны том том дуслууд хаялан дусалж байлаа.
Үдийн нэг цаг хагасын үед улсын Шинжлэх Ухааны Хүрээлэнгийн үүдэн дээр арваад хүмүүс нэгэн юмыг тойрон үзнэ...
Энэ хэн бэ гэвэл Хэнтий аймгийн нутагт дугуйгаар аялах гэж байгаа Хөдөөгийн Пэрлээ гэдэг гэнэ. Энэ аль хэдийнээс ийнхүү дугуйгаар аялах гэсэн бодолтой юм санжээ.
Пэрлээг үдэж байгаа хүмүүс, Пэрлээ гагцаар явж чадна уу, үгүй юү? гэж итгэж ядсан байдалтай тус тусын царайд баахан сэтгэл зовсон байдалтай «За сайн яваарай», «Амжилттай яваарай» гэцгээж байлаа.
