Зохиолч: Т. ДРАЙЗЕР
Орчуулагч: Бундын Энэбиш
Ангилал: Америк уран зохиол
Хэвлэлийн газар: УЛСЫН ХЭВЛЭЛИЙН ХЭРЭГ ЭРХЛЭХ ХОРОО
Прокурор авдар дотор бас юу байгааг хүлээж байж үзэх гэсэнгүй. Эдгээр захидлыг уншиж гарав. Тэр эхлээд Робертагийн эхний гурван захиаг уншсаны дараа Бильцээс Робертагийн явсны шалтгаан тун тодорхой болов. Дараа нь сэтгэл хөдлөм жирийн хямд цаасан дээр бичсэн эхийн нь эхний гурван захиаг уншив. Эх нь Канзас Ситид Клайдын гаргасан болгоомжгүй явдал ба бас түүнийг тэндээс явахад хүргэсэн золгүй явдлыг дурсаад, ирээдүйд замаа алдахгүй байгаарай гэж шургуу ч, эелдэг ч ятгажээ. Тавчиг зантай, хүн ба хүний харилцааг нэн явцуу мэддэг Мейсонд энэ этгээд нь хар багаасаа тогтворгүй зантай, хөнгөн хийсвэр, завхай зайдан хүн байжээ гэсэн сэтгэгдэл төрүүлэв.
Үүний зэрэгцээгээр Клайд энд баян авга ахын дэмжлэгийг авдаг байсан боловч Грифитсийн овгийн ядуу бөгөөд тун сүсэг бишрэлтэй хэсгээс гаралтай юм гэдгийг мэдээд гайхжээ. Ерийн нөхцөлд бол Мейсон үүнээс болж Клайдыг нэлээд зөөлнөөр үзэх байсан ажээ. Гэвч одоо Мейсон Сондрагийн зурвасууд, Робертагийн эмгэнэлт захидлууд, Канзас-Ситид хийсэн урьдын ямар нэг гэмт хэргийн тухай эхийнх нь дурссан зүйлийн нөлөөгөөр Клайдыг зан чанараараа энэ шинэ гэмт хэргийг бодож боловсруулах төдийгүй, харин ажиг ч үгүй биелүүлж бүрэн чадах хүн гэж итгэжээ. Тэр Канзас-Ситид яасан юм бол? Тэндхийн прокурорт цахилгаан явуулж, дэлгэрэнгүй байдлыг асуух хэрэгтэй юм...
