Энэхүү түүхийн учрыг тайлбарлах нь: Манай монгол хэмээгч улс бөгөөс үүний урьд долоон зуун оны чанад дор гарсан Чингис, Хубилай сэцэн хааны үесээс маш хүчирхэг эрэлхэг бөгөөд Хятад, Орос, Энэтхэг, Төвд бас бус олон хэлний улсуудыг эрхдээ хурааж өмнө тийш хэлбээс өмнөд халуун тив хүрсэн ба зүүн тийш Зүүн далай, хойш Умард мөсөн далай, баруун тийш Европ тивийн хагасыг хүртэл эзлээд, их тулгуурыг нээж туйлын их хан төрийг байгуулж агуу их алдар сүрийг бүх дэлхийгээр дуурьсуулан алдаршуулж яваад дараагаар арван наймдугаар Тогоонтөмөр хаанд хүрч бүх эзэлсэн олон улсыг хүчирхийлэн чадахгүй болоод Хэрлэн мөрний Барс хотонд нүүн ирж зөвхөн Монгол аймгийн хаан сууж гучин дөрөвдүгээр Даян хаанд хүрч мөн хаан бээр наян дөрвөн он хаан сууж нөгчсөний дараагаар дотоод гадаад монголчууд хэмээн тасран салж өмнөд монголд Түмдийн Алтан хаан сууж ар халхад тусгай хад (хаад) гарч ирэхийн сацуу хятад манж нар уран арга овтой бодлогыг хэрэглэж монгол улсыг нэгэнт мөхөс доройд хүргүүлсний дараагаар эрх мэдэлдээ бүрмөсөн хураасан ба дараагаар манжийн төр халагдаад Оросын эзэрхэг засаг монголд өнгөлзсөн ба гамин хийгээд цагаан намын харгисуудыг удаа дараа Монгол газарт шургуулан олон монголчуудыг хяхан зовоож байснаас Оросын эзэрхэг засгийг устгасан улаан нам монголд орж эзэрхэг харгис этгээдийг хөөн арилгаад монгол улсыг дахин сэргээж ардын эрхтэй хэмжээт засгийг байгуулаад одоо бидний монголчууд урьдах явдлаа гэмшин сэтгэж хойших хэргийг сайжруулахыг бодож Зөвлөлт орос лугаа туслалцсан ба бас одоогийн цагт монголыг тойрон бүхүй Хятад, Рибэнь, Америк зэргийн улсуудын хоорондын байдал чухам ямар мэт байгааг товчлон үзүүлсэн нь болой.