Зохиолч: Ш. Гаадамба
Орчуулагч:
Ангилал: Монголын уран зохиол
Хэвлэлийн газар: Улсын хэвлэлийн газар
Ингээд урамгүйхэн буцах гэж байснаа сурвалжлагч хүний янаг дагуул болсон зургийн жижиг аппаратаараа зураг авч өгье дөө гэж бодлоо. Хүүхэн ч уриалгахан зөвшөөрч «Зургийг минь өгөөрэй» гэж танилцсан бүсгүйн цайлган сэтгэлээр шимтэн захиж билээ. Хүүхэн гэзэг үс, хувцас хунараа засаж янзлах зуураа,
— Дээл минь элбэгдэж, их муухай гарах байгаа даа гэж баахан санаа зовж хэлэхэд нь,
— Зүгээр зүгээр, танай нутгийн (Дорноговийн Хатанбулаг сумын хүн гэж өөрөө ярьсан юм) хүүхнүүд элбэг дээл өмсөх дуртай юу? гэж үгийн далимаар сонирхлоо.
— Үгүй хаанаас гээд дээлээ хэрхэн элбэгдүүлсэн учраа ярьж өгөхөд нь гар хоосон буцсан жинчин аяны зам дээрээс санаандгүй бөөн алт олсон мэт баярлаж билээ...
