Зохиолч: Гуннар Гуннарссон
Орчуулагч: X. Гунгаажав
Ангилал: Гадаадын уран зохиол
Хэвлэлийн газар: Улсын хэвлэлийн газар
өөрийн үүргийг үнэн зөв, шударгаар биелүүлж бусдад өр тавихгүй явбал хамаг хэрэг бүтэх нь тэр гэдгийг их Сньольфур хүүдээ цаг ямагт сануулдаг байлаа. Мухлагт сохор мөнгөгүй очиж өр тавихын оронд эцэг, хүү хоёр өлсөхөөс ер буцахгүй. Тэр хоёр хуучин таараар өөртөө хувцас хийж урагдаж дуустал нь өмсөж эдлэх боловч ер зээл авдаггүй байв.
Тэдний ойр хавийн хүмүүс цөм тэр худалдаачинд их бага өртэй байлаа. Зарим нэг нь өрөө аажмаар төлж дуусах боловч ихэнх нь өрөө төлөх хүч хүрдэггүй байв. Эцэг, хүү хоёр бусдад ганц ч мөнгөний өр тавиагүйг бага Сньольфур сайн мэдэх бил ээ. Дээр үед их Сньольфур худалдаачинтай данстай байсныг хүү нь үл мэднэ.
Өвлийн цагт цас, шуургатай өдөр тэнгист гарч үл болох тул эцэг, хүү хоёр зуны цагт аль болохоор арвилан хэмнэхийг хичээнэ. Зуны дулаан цагт бол загас хатаана. Хатаасан загасныхаа хагасыг худалдаачинд тав арван мөнгөнөөс өгч хоол хүнсний зүйл худалдаж авдаг байв. Гэвч өвлийн хатуу ширүүн улиралд хоол унд ер тэсдэггүй байлаа. Хоол ундтай сууж байсан хавар тун цөөн...
