Барилгын мэргэжилтэн Дмитрий Осипович Ваксин, сүнс дуудахад оролцоод, дөнгөж болж өнгөрсөн явдлаа бодсоор хотоос зусландаа эргэж ирэв. Тасагтаа ганцаар, хувцсаа тайчиж хэвтэх үедээ (авгай нь гурван эрдэнийн хийдэд очсон юм санж) Ваксин гуай, үзэж сонссон бүхнээ өөрийн эрхгүй санаж эхлэв. Тэр үдэш чухамдаа сүнс дуудсан ч үгүй, дандаа аймаар юм ярьцгааж өнгөрсөн юм санжээ. Нэг хүүхэн юу юугүй, гэнэт хүний санаа бодлыг тааж мэдэх тухай ярьж эхлээд, түүний улмаас сүнсний тухай ярианд аяндаа шилжиж, сүнснээс чөтгөр буг ярьж, чөтгөр бугийг амьдаар нь оршуулан булсан хүнийг ярьж билээ...
Нэг ноён, авсан дотроо эргэлдэж хөдөлсөн үхдэлийн тухай аймшигтай өгүүллэг уншаад, Васкин өөрөө нэг дийз авчруулаад, сүнстэй яаж үг хэлэлцэхийг хүүхнүүдэд ярьж авга Клавдий Мироновичийнхаа сүнс дуудаж, «Би орон байшингаа эхнэрийнхээ нэр дээр шилжүүлбэл ямар вэ?» гэж асуухад: «Цагаа олбол ер нь сайн» гэж хариулсан байжээ...
