Зохиолч: Т. ДРАЙЗЕР
Орчуулагч: Ц. Гомбосүрэн
Ангилал: Америк уран зохиол
Хэвлэлийн газар: Улсын хэвлэлийн газар
Каупервуд ганцаараа үлдээд мөнгөн санхүүгийн зардлын талаар гүн бодолд дарагдав. Эцсийн дүнд хангалттай фунт стерлийг гаргах нь хамгийн «Сезам онгой» хэмээх ид шидийн үгтэй дүйхүйц арга гэж үзэв. Өөр хоорондоо марган хэрэлдэж байсан хувь нийлүүлэгчдийн нүдний өмнө асар их мөнгө гаргаж хорхойг нь хүргэвэл тэд үзэл санааны ямар ч зөрчилтэй байсан тэр мөнгөнөөс олж авах гэж бүгдээрээ ухасхийхдээ юуны тухай маргаж байснаа ч мартаж орхидог. Эдгээр хэлэлцэн тохирдоггүй захирлууд болон хувь нийлүүлэгчдийн гарт байгаа тус бүрдээ нэг фунтын үнэ бүхий акцыг хоёр гурав дөрвөн ч фунт стерлингээр авъя гэвэл ч... Салбар нийгэмлэгээс түүнд орох орлого болон Лондон шиг ийм том түргэн өргөжиж байгаа хотод газар доорх тээврийн хөдөлгөөн улам бүр өсөж байгаа нь түүний тэдэнд амлахад бэлэн байгаа итгэшгүй их үнийг нөхөөд зогсохгүй алгуурхан энэ хүмүүсийн санаанд огт ороогүй тийм их орлогыг түүнд авчрах болно. Ингээд юуны өмнө хяналтыг л өөрийн гарт авч ямар ч үнэтэй байлаа гэсэн дараа нь бүх шугамыг нэгтгэх хэрэгтэй. Цаг хугацаа болон алхам бүрд өсөж байгаа дэлхийн санхүүгийн эргэлт энэ бүгдийг амархан нөхнө...
