Зохиолч: Чингиз Айтматов
Орчуулагч: С. Бадраа
Ангилал: Киргизийн уран зохиол
Хэвлэлийн газар: Улсын хэвлэлийн газар
Хуучирч элсэн тэргээр нэг хөгшин хүн явж байв. Гульсары нэртэй жороо халиун морин бас хөгширчээ. Тун ч хөгширч...
Уулын бэл өгсөх зам барагдахгүй. Нэн залхуутай. Энэхүү цөлийн бор толгодын дунд өвөл бол дандаа явган шуурга нүдэж, зун бол там шиг халуун болно.
Ижилгүй сайхан шаргал халиун зүсээрээ Гульсары хэмээх нэр авсан энэ жороо хөгшин морин Александровкийн хөтлийг эцсийн удаа давж, одоо Танабайг эцсийн мод газар чирч явааг тэр бээр хэрхэн мэдэх билээ. Согтуу өвс идсэн адил морины толгой эргэж, булингартах нүдэнд нь газар дэлхий тасран нэгэн тод өнгийн дугуй болон хөвөөд бие салганан ийшээ найгахад нь энтээ талын тэнгэр, тийшээ найгахад нь тэртээ талын тэнгэр үзэгдэн үзэгдэн явааг Танабай хэрхэн мэдэх билээ. Энэ үес Гульсарын өмнө зам гэнэ гэнэ тасран хоосон харанхуй болж, урдах зам, тэртээ уулс цөм улбар манан юм уу утаан дотор хөвөх шиг харагдах ажээ...
