Зохиолч: А. Алексин
Орчуулагч: Ч. Алтанзагас
Ангилал: Хүүхдийн уран зохиол Оросын уран зохиол
Хэвлэлийн газар: БНМАУ-ын Ардын боловсролын яамны хэвлэл
Намайг арван зургаан жил хүсэн хүлээсэн юм гэнэ билээ... Хэнз хүүхэд болж төрөх шал дэмий гэдгийг би андахгүй ээ. Цагтаа олдсон хүүхэд бол эгээ л сурагчийн сурлагын хүснэгтэд тавьдаг дүн шиг дорхноо гараад ирдэг. Харин хэнз хүүхдийг бол хүлээлгэж хүлээлгэж арай гэж нэг гарахчаан болохоор нь тостой гараар ч барихгүй, тоостой газар ч суулгахгүй... түмэн төвөгтэйгөөр үл барам болдог сон бол газрын мухар, тэнгэрийн савслага руу зугтаад явчихмаар, яршигтайг нь яана.
Аав ээж нь “Бид хоёр чамайг хэчнээн хүлээсэн гэж санана! Мөн ч удаан хүлээсэн дээ!..” гэж, хэнз хүү нь кинонд ороод ч юм уу гэрээсээ гараад удчихсан юм аятай л үглэцгээнэ.
Би өөрөө хэнз хүүхэд байгаа юм. Анх, аав ээж хоёрыг хүүтэй болох сон гэж хүссээр байтал Людмила гарчихжээ. Людмила бол миний эгч л дээ. Сүүлдээ Людмила гурвуулаа миний мөрөөсөл болох болж. Арван зургаан жилийн хойно л нэг юм хүсэл нь биелж дээ! Үнэхээр ч оройтсон юм. Гэхдээ надаас болсон хэрэг биш биз дээ?..
