Зохиолч: Гүи Де Мопассан
Орчуулагч: Харгана Г. Амар
Ангилал: Францын уран зохиол
Хэвлэлийн газар: Улсын хэвлэлийн газар
эзэмдэн, өөдлөн дэвших замаа олж аврагдсан мэтээр саналаа. Тийн бодоод сая Форестье авгай өөд харвал тэр нь нүд салгалгүй ширтсэн хэвээр байжээ.
Авгай нарийхан бэлхүүс, товгор хөхийг нь ил гарган барьсан цагаан цэнхэр кашемир даавуун платьтай агаад хөвсгөр цагаан сүлжээсэн хөвөөтэй захаар нь хүзүү, богино ханцуйгаар нь гар нь нүцгэн гарчээ. Үсээ өндөр овойлгон янзалсан нь ар шилэндээ жаахан буржийж, хөвөн зөөлхөн үүл мэт хөөрхөн цайвар өнгөтэй харагдав.
Түүний харц урьд орой нь Фоли-Бержерт Дюруатай дайралдсан хүүхний харцыг ямар нэгэн талаар санагдуулсан нь зориг оруулж, хүнээс гойд болгосон цэнхэр туяатай бор нүд, нарийхан хамар, бамбагархан уруул, ялимгүй махлаг эрүү нь өөр хоорондоо зохилдоогүй мэт боловч туйлын үзэсгэлэн гоо, залирхаг, дур булаам хөөрхөн нүүрийг үүсгэжээ. Энэ бол юм бүхэн нь хүний дур татам бөгөөд өчүүхэн боловч хөдлөх өөрчлөгдөх нь нэгнийг хэлж, нөгөөг нуух увдистай хүүхнүүдийн царай яах аргагүй мөн байлаа...
