Нөхөр Нацагдорж зан ааш дөлгөөн даруу, үг цөөн, үерхэг нөхөрсөг, хүнийг хүндэтгэх нь дуурайлтай, ихэрхэг бардам зан огт байхгүй энгийн ярих буюу хурал дээр үг хэлэхийн өмнө нүдээ дээш харж бодлого тавьж байгаа юм шиг байгаад ярихдаа удаан болгоомжтой бодлоготой оновчтой цөөхөн үгээр санал шүүмжлэлээ тавих бөгөөд ер илүү сул үг хэлэхгүй.
Нөхөр Нацагдоржийн эцэг тайж Дашдорж гэгч гэр ядуу хэрүүлч заргач, мөрийтэй тоглоом наадамд их дуртай, сүм хийдийн жас ноёд баядаас мөнгө юм зээлдэж аваад эгүүлэн өгөхгүй элдвээр аргацаан завшина. Тэгээд бусдад үлэмжхэн өр алдаж амьдралын байдал нэн дорой, хөвүүн Нацагдоржийнхоо олсон цалинд шүтэж нэгэн гэрийн дотор амьдарч байсан билээ.
Нөхөр Нацагдорж нийгмийн гарлын талаар хэдий язгууртны гэр бүлийн дотор төрсөн боловч...
