Зохиолч: Лао Шэ (Шө)
Орчуулагч: Г. Сүхбаатар
Ангилал: Хятадын уран зохиол
Хэвлэлийн газар: УЛСЫН ХЭВЛЭЛИЙН ХЭРЭГ ЭРХЛЭХ ХОРОО
Хоолоо идээд, ханзан дээр гарч гараа салаавчлан дэрлэж хэвтэв.
— Хөе! Чи ирж энэ юмнаас цэвэрлэлцээч! гэж Ху Ню, түүнийг гадаа өрөөнөөс дуудав.
Тэр, залхуу нь хүрсэн байртай босож түүнийг нэг харснаа очиж ажилд нь туслалцав. Урьд нь тэр маш их ажилсаг байсан бол одоо нэлээн их гэдгэр хөдөлж байв. Лю өвгөнийд ажиллаж байхдаа тэр үргэлж Ху Нюгийн ажилд туслалцдаг байсан бол одоо түүнийг харах тутам улам дургүй нь хүрч, Ху хүүхэнд өшиж байгаа юм шиг урьд өмнө нь ингэж хүнд өшиж байгаагүй, яагаад ингэж байгааг өөрөө ч ойлгохгүй байлаа. Уур нь хүрэвч түүнтэй марган хэрэлдэх онц биш, ингээд бодоход өрөө нь хүртэл жижигдэж бөгс эргэх зайгүй мэт санагдахад улам ч дотроо бухимдана...
