Зохиолч: Г. Б. Гофман
Орчуулагч: Д. Бадарч
Ангилал: Түүх Оросын уран зохиол цэрэг дайны сэдэвт
Хэвлэлийн газар: Улсын хэвлэлийн газар
Ларетта цамхгийн цаг зургаан удаа цохиж, хонхнуудын уянгатай дуу сонсогдов. Мандах нарны түрүүчийн туяа Чернинскийн ордны дээд давхарт тусаад байхад эзэн орны төрийн нарийн бичгийн дарга Карл Герман Франк унтаагүй байлаа. Франк цонх руу алгуурхан очиж хөшгийг нь сөхөөд нойрноос сэрж буй хотыг ажиглан харав.
Франк гунигтай бодолд дарагджээ. Эрхэм фюрер нь амиа хорлосон тухай мэдээ өчигдөр орой аваад сандарган мэгдүүлжээ. Гитлер үхэж хамаг найдвар нь тасрав. Холбоотны цэрэг агуу их эзэнт Герман улсыг хоёр хэсэг хуваажээ. Хаа нэгтэй Умар зүгт нэг газар адмирал шинэ засгийн газар зохион байгуулж, өмнө зүгт Герман Геринг англи-америкийн цэргийн командлалтай шууд холбоо тогтоохыг хичээж, бас Кальтенбруннер «Альпийн цайз»-д явууллага хийж байлаа.
Карл Герман Франк хувь заяагаа дахин сорихгүйгээр шийдээд туслахаа дуудаж, үсчингээ оруулаад ир гэж тушаав. Дүрээ хувиргаж, Чернинскийн ордны уудам саруул танхимыг орхин одох цаг болсон. Бас тэгээд аль болохоор түргэлэх хэрэгтэй байлаа. Босогчдын түрүүчийн буудлагын дуун чехийн нийслэлийн нарийхан гудамжнуудад нижигнэж эхлэв.
Карл Герман Франк цаг хожихын тулд босогчидтой хэлэлцээр хийж эхлэх захирамж өгөв...