Зохиолч: М. Горький
Орчуулагч: С. Бадраа
Ангилал: Оросын уран зохиол
Хэвлэлийн газар: Улсын хэвлэлийн газар
Самгин дээд сургуулийн хууль цаазын ангид орж буруутсанаа хэдийн мэдээд төдийлөн сонирхолгүй, хар зөндөө сурдаг байв. Тэрээр алуурч, шатаагч, луйварчдыг өмгөөлөн үг хэлдэг өмгөөлөгч болно гэж өөрийгөө хэрхэвч бодохгүй байжээ. Ер нь хуурмаг, хоёр нүүртэн гэж өөрийн үздэг тэр хүмүүсийг цагаатгах зөвтгөхийг хэрхэвч бодохгүй агаад тийм хүмүүс бол оюун санааны хувьд өвөрмөц магадгүй арьсны хувьд ч ондоо Клим Самгины аж төрөхөд нь ямар нэг талаар саад болдог байжээ.
Самгин мужийн шүүхийн эрүүгийн хэргийн хэсэгт тав зургаан удаа очиж үзжээ. Үүнээс өмнө тэр хааяа сүмд ордог байснаас биш шүүхийн танхимд орж үзээгүй явжээ. Гэтэл тэнд орж үзвэл дээр үед сүмд орж байсантай нь их л адил сэтгэгдэл төрүүлж байжээ. Шүүгчийн ширээ нь тахилын ширээ шиг, хааны хөрөг өлгөсөн нь тахилын ширээнээс их цаана үзэгдэх бөгөөд шүүхийн төлөөлөгчийн байр, ялтны суудал нь сүмийн дуучдын тавцан адил харагдаж ажгуу.
Клим анх удаа нэг урагшгүй хэрэг таслахад таарчээ...
