Зохиолч: Н. С. ЛЕСКОВ
Орчуулагч: Б. Ринчен
Ангилал: Үлгэр, домог Оросын уран зохиол
Хэвлэлийн газар: Улсын хэвлэлийн газар
Балар эрт дээр цагт нэгэн Сайн үл алдаршсан улсад Сайн хүсэлт нэртэй маш мэргэн нэгэн хаан байж гэнэ ээ. Дайн хөл хийх дургүй, хамаг хүн олонд сайныг хүсэх тул, тийнхүү Сайн хүсэлт гэж алдаршсан авай. Аж төрөхдөө хуучин ёсоор суух дуртай. Төр барихдаа үлэмжид буян санаж, өвгөд дээдсийн дуртгал ёсоор хэрэг шийтгэн төрд минь үнэн шударгын ёс, хилс гажууг давах болтугай. Хан тамга барьж байгаад минь хамаг олон сайн сайхан суух болтугай гэж байдаг чадлаараа хичээн мэрийх боловч, тэр ёсоор болж өгдөггүй нэгэн учир байвай. Сайн хүсэлт, нэгэн хэргийг нэг зах сэжүүрээс нь өөд нь татаж эхэлтэл, нөгөө зах сэжүүрт нь биш болчхоод байдаг байв. Янз бүрийн аргаар ядаж цөхөж, горь алдаж гонсойв гэнэ. Хөлс алдаж, хүч зориг шантрав гэнэ. Цөхөж горьгүй болсондоо жүжигчдийн наадам, бүжиг, хатны хайр цэнгэл, ав шувуу ч сэтгэл сэргээхгүй болж, зүс царай алдаж, сүр сүлд буураад, хадан гэрийн хаяа ойртож гэнэ ээ...
