Зохиолч: Эдгар Аллан По
Орчуулагч: Ц. Шүгэр
Ангилал: Америк уран зохиол Адал явдалт
Хэвлэлийн газар: УЛСЫН ХЭВЛЭЛИЙН ХЭРЭГ ЭРХЛЭХ ХОРОО
Тэгээд уул захиаг хайрцаг руу шургуулчих гээд бүтэлгүй, ширээн дээр орхижээ. Хаяг нь доошоо хараад хэвтэж байсан болохоор анзаарагдалгүй өнгөрч ч мэдэх байж. Энэ үеэр сайд Д. орж ирсэн байна. Түүний шөвөлзүүр нүд, хоромхон зуур дугтуйг ажиглаж, хаяг бичсэн гарын үсгийг таниад хүүхний аягүй байдалд орох нь бас мэдэгдэж, нууц нь тааварлагджээ. Сайд энэ тэр ажил явдал ярих зуураа, бидний яриад байгаа захиатай тун адил өөр нэгэн захиаг нөгөө л яарч тэвддэг байдлаараа гаргаж дэлгэн уншиж байгаа дүр үзүүлсэн байна. Дараагаар нь ширээн дээр байсан түрүүчийн захиатай зэрэгцүүлж тавьчхаад, төрийн явдал ярьж гарчээ. Ийн байсаар мөч өнгөрсний дараа өөртөө хамаагүй нөгөө захиаг хамт шүүрч аваад гарч явсан байна. Захианы эзэн хүүхэн, энэ залийг нь мэдсэн боловч, бас өөр нэг хүн байсны улмаас хулгайчийг зогсоож чадсангүй. Сайд, уншаад авах юм байхгүй өөр хэнд ч хэрэггүй захиагаа үлдээгээд гарчээ..
