Зохиолч: Х. Х. Андерсен
Орчуулагч: Л. Түдэв
Ангилал: Үлгэр, домог
Хэвлэлийн газар: БНМАУ-ын Ардын боловсролын яамны хэвлэл
Эзэн хаан тэргүүн сайдаа дуудуулав. Тэргүүн сайд нь ихэд сагсайж, доорд хүмүүсээ юм асуухад зөвхөн л «Хн» гэж дуугардаг болсон хүн ажээ. «Хн» гэдэг нь ямар ч утгагүй авиа шүү дээ.
— Би эрдэмтний номоос манайд алтан гургалдай гэгч шувуу байдгийг олж мэдлээ. Миний улсын тэргүүн зэрэг сонин юмны тоонд тэр ордог гэнэ. Энэ шувууны тухай надад яагаад мэдэгдээгүй вэ?
— Эзэн дээдэс ээ! Би тэр тухай сонсооч үгүй. Эзний ордонд нэгээхэн удаа ч үзэгдээгүй гэж тэр Тэргүүн сайд бөхөлзөн өчлөө.
— Надад байгаа юмыг орчлон даяар мэдэж байхад би өөрөө мэддэггүй шүү. Өнөө үдэш тэр шувуу энд ирж надад жиргэхээ үзүүлбэл зохино гэж эзэн хаан тушаалаа.
— Би түүнийг эрж олъё, эзэн дээдэс ээ! гэж Тэргүүн сайд амлажээ...
