Зохиолч: И. А. ГОНЧАРОВ
Орчуулагч: Ш. Очирбат
Ангилал: Оросын уран зохиол
Хэвлэлийн газар: УЛСЫН ХЭВЛЭЛИЙН ХЭРЭГ ЭРХЛЭХ ХОРОО
Өвдсөнийхөө дараа Илья Ильич удтал их л уруу байж, бүхэл бүтэн цагаар элдэв шаналаантай бодолд автдаг, Захарын юм асуухад заримдаа хариу дуугарахгүй, Захарын аяга шаазан хагалж, ширээ шүүгээний тоос арчихгүй байгааг юм уу, баярын өдөр уйдаад сууж байхад нь эзэгтэй боов барьсаар орж ирж байгааг ажихгүй байдаг байв.
Цаашлаад энэ сэтгэлийн зовлон нь зөөлөрч алив бүхэнд хааш хэрэг, мохоо хандах болж ирэв. Гадаа цас орж, хашаа, гудамжинд хунгар тогтож байгааг, хашаан доторх түлээ, нохойны пин, цэцэрлэг ногооны газар сэлт цасанд дарагдахыг, ер хашааны шон дээр цас овойн тогтохыг, бүх юм хүүрийн цагаан даавуунд ороогдож үхсэн мэт нам гүм болохыг Илья Ильич бүтэн цагаар ажиглан сууна...
