Зохиолч: А. П. Чехов
Орчуулагч: Р. Гүрбазар
Ангилал: Оросын уран зохиол
Хэвлэлийн газар: Улсын хэвлэлийн газар
Надя одоо хорин гуравтай, арван зургаан настайгаасаа эхлэн хүнтэй суух сан гэж хүсэл мөрөөдөл болсоор харин одоо цонхны дэргэд зогсож байгаа мөнөөхөн Андрей Андреичийн сүйт бүсгүй болжээ. Залуу бүсгүйд тэр залуу таалагдсанаар барахгүй бүр долоодугаар сарын долоонд хуримаа хийхээр нэгэнт товлосон хэр нь нэг их баяр хөөргүй, шөнө нойр хулжин цог жавхаа нь арилжээ. Гал зуух байдаг газар доорх давхрын цонхноос яаран сандарч байгаа, хутгаар юм хэрчих, хаалга савчих нь тод сонсогдоно. Бас шарсан цацагт хяруул, даршилсан интоорын үнэр ханхална. Яагаад ч юм бэ, амьдрал энэ чигээрээ л өөрчлөлтгүй байх юм шиг санагдана...
