Гэрийн эзэн, гаансаа зуугаад, гурил элдэж байв. Гал дээр хоёр тогоонд юм буцалж, гэрийн эзэгтэй ахимаг насны авгай, зомгол асаан гэрэлтүүлж, тогоотой хоолоо үзэж байв.
Баруун хойморт суусан нэг хүн, шинэ хоноц ирэхэд «Хоноц, хоноцдоо дургүй» гэгчээр бас юун хүн ирэв дээ гэж бодов.
Богцноос нь сонины булан цухуйсныг харж, албаны хүн байж мэднэ гэж санасан учир суудлаа засаж, солгой хөлөө нугалж суугаад, өмнөх аяганы ширээг биеэсээ бага зайчилж тавихдаа тавагтай идээг нь нурааж, аягатай цайгаа ялихгүй цалгиажээ.
Гомбо ухуулагч, түүнийг сэмхэн ажиглаж таньсан боловч тэр хүн Гомбыг таньсангүй...
