Зохиолч: П. П. Бажов
Орчуулагч: У. Дамдинсүрэн
Ангилал: Үлгэр, домог Оросын уран зохиол
Хэвлэлийн газар: Улсын хэвлэлийн газар
Хүн болгоны дурсаж ярьсныг итгэх аргагүй билээ. Хэрэг явдал ч бас янз янз байдаг. Зарим нь цагаа алдаж орсон нойтон цас унуутаа хайлж алга болдог шиг ул мөргүй өнгөрдөг. Өнгө ялгаран солонгорох ургаа чулуу шиг мартагддаггүй хэрэг явдал ч бий. Тийм чулуу элэгдэнэ гэж байхгүй, холоос бараа нь харагддаг. Зуун жил өнгөрсөн ч тэр чулууны тухай ярьсан хэвээр байх ажээ. Он жил өнгөрсөн хойно тэр чулууг эргэж үзээд:
— Ийм л чулуу байж дээ. Бид огт өөрөөр бодож явжээ гэж гайхаж ярилцах нь байдаг.
Манай Златоустад хайлуулсан ган яг ийм байжээ. Тэндхийн заводод тэр үед байгаагүй тийм сайн ган хайлуулснаас хойш зуу гаруй жил өнгөрлөө. Тэгэхэд тэр заводын дарга, мастер гэж олон герман байсан ажээ. Бид л тийм ган хайлуулах аргыг нээж оросын ажилчдад зааж сургасан гэж өөрийн болгохыг германчууд хүсэж байсан нь ойлгомжтой. Харин инженер Аносов тэдний дур зоргоор болгосонгүй, бид германгүйгээр ган хайлуулсан гэж өөрийн номд бичсэн юм...
