Зохиолч: Г. М. Марков
Орчуулагч: С. Бадраа
Ангилал: Оросын уран зохиол
Хэвлэлийн газар: Улсын хэвлэлийн газар
Их ч цастай, их ч шуургатай өвөл болов. Цасан шуурга Горхитын гудамжинд бараг байшингийн дээвэртэй сацуу хунгар овоолжээ. Хус, монос, тэс, хотын төв цэцэрлэг цөм цасанд дарагджээ. Хүүхдүүд их хунгар цасыг малтан цайз байгуулж, далд хаалга, орц гарган цасыг дөрвөлжин дөрвөлжин зүсэж нуувч хийж, зөндөө байлдаж тоглох агаад заримдаа «фашистуудад үхлийн цохилт өгье! Ура!» гэж хашхиралдан «дайсны» өөдөөс халз тулалдан байх нь үзэгдэнэ. Нестеров хүүхдийн тийнхүү байлдан наадаж байхыг харж инээмсэглэн, «Дайн байлдаан манайхны аж байдалд хүртэл нэвтрэн орсон байна шүү! Дайныг ингэж хойшид ч их удаан дурсах биз. Тэгж л байг! Хүмүүс дайны учруулсан гашуун зовлонг хэдий чинээ удаан дурсан санаж байх тусам шинэ дайнд бэлтгэхийн эсрэг төдий чинээ махран тэмцэх болно» гэж бодно...
