Ажилч хөдөлмөрч байх гэдэг бол хүний нэр төрийн нэг зайлшгүй хэмжүүр мөн нь хүн бүхэнд илэрхий.
Энэ утгаар Едигей Жангильдин буюу таньдаг улсын нь нэрлэдгээр Едигей бол ёстой үнэхээрийн ажилч хүн. Тийм л хүмүүсийн хүчинд энэ дэлхий маань тогтож байдаг гэж ярилцах нь бий. Миний л бодож байгаагаар, энэ хүн эрин үетэйгээ үлэмжийн бат журмаар холбоотой агаад цаг үеийнхээ хүү нь болсон энэ хүний мөн чанар үүнд оршино.
Чухам эл учраас энэ роман зохиолд хөндсөн асуудалд хандахдаа, фронтын хуучин дайчин, төмөр замын жирийн ажилчин энэ хүний хувь заяагаар ертөнцийг харах нь миний хувьд чухал байлаа. Би ч чадах чинээгээрээ үүнийг гаргаж бичихийг хичээв...
Ажилч хүн бод хувь хүн, түүний оюун ухааны ачаалал туйлын их, амьдран буй цаг үе нь түүн дээр бөөгнөрч байдаг учраас амьдралын мөнхийн хийгээд өнөөгийн харшилдаан маргалдааны дотор тийм хүн төдий чинээ сонин бөгөөд чухал байна. Тийм ч учраас би Шуурган Едигейг амьдарч буй үеийнхээ дэв журмын төвд, сэтгэлийг минь зовниулдаг асуудлын төвд тавихыг оролдсон юм.
Шуурган Едигей бол заяанаасаа ч эрхэлсэн ажлаараа ч хөдөлмөрч хүн төдийгүй ажилч сэтгэлтэй хүн. Ажилч сэтгэлтэй хүний өөртөө тавьдаг асуултыг бусад хүн түгдрэлгүй бэлэн хариулах нь бий. Тийм учраас ч тэд ямар нэг ажилд залхуу хойрго, ажил сайн хийлээ ч гэсэн зөвхөн хэрэглэхийн тулд амьдардаг болой.
Тэгвэл ажилч сэтгэлтэй хүмүүс өвөр хоорондоо ямар нэг ахан дүүгийн барилдлагатай юм шиг байдаг. Тэд ямагт нэгийг нөгөөгөөс ялгаж ойлгох чадвартай агаад ухаж ойлгохгүй юм гэлээ гэхэд юмыг ихэд эргэцүүлэн бодно. Манай цаг үе бол урьдынхыг бодвол эргэцүүлэн бодох юмаар нэн элбэг үе юм. Хүний ухаан санаа хэдийн эх дэлхийгээс сансарт тэмүүлэх болжээ...
Би энэ зохиолоо, урьдахын нэгэн адил урьд үеийнхний өв болгон бидэнд үлдээсэн туршлага болох үлгэр домог, хууч үгийн зүйлийг түшиглэн бичив. Үүний зэрэгцээ би практиктаа анх удаа уран зөгнөлийн санаа сэдэв хэрэглэв. Гэвч үүний аль аль нь миний гагц зорилго биш. Үнэн байдлыг танин мэдэх ба утгыг илрүүлэх нэг арга барил бол сэтгэх арга юм.
Манай дэлхийгээс өөр ертөнцийн соёл иргэншил бүхий улстай холбоо тогтоосон тухай бичсэн үйл явдал, тэр учир шалтгаанаар болж буй бүхий л хэрэг явдал ямар ч бодитой үндэс суурьгүй зохиомол зүйл гэдэг нь мэдээж. Манай дэлхий дээр хаана ч шар талын юм уу невадын сансрын хөлгийн буудал гэж үнэндээ байхгүй. Энэхүү «сансар судлалын» талаар гардаг бүхий л үйл явдлыг би санаанаас зохион бичихдээ манай гаригийн хүмүүсийн хувьд далд аюул удаж болох байдлыг гаж жигтэй, хэтрүүллийн хэлбэрээр хурц гаргах гэсэн ганцхан зорилго тавьсан юм.
