Зохиолч: М. Горький
Орчуулагч: Д. Лхамжав Д. Дашдорж
Ангилал: Намтар, дурсамж
Хэвлэлийн газар: УЛСЫН ХЭВЛЭЛИЙН ХЭРЭГ ЭРХЛЭХ ХОРОО
Үзэн ядаж чадахгүй бол үнэнээсээ дурлах боломжгүй. Амьдрал гэдэг ийм хачин зохиогдсон байдаг. Хүнийг эвдэн гуйвуулах үндэс болох санаа сэтгэлийг хоёрдуулахын зайлшгүй, үзэн ядаж байж дурлахын гарцаагүй ганцхан энэ шаардлага л амьдралын одоогийн нөхцөлийг эвдэхийг шаардаж байна.
Зовон шаналахын зайлшгүй чанар нь «санаа сэтгэлийг аврах» хамгийн тохиромжтой хэрэгсэл гэж номлогддог. Орос оронд хүмүүсийн уй гашуу, зовлон зүдүү, шаналлыг Ленин шиг ийм гүн гүнзгий хүчтэйгээр үзэн ядаж, дургүйцэж сэтгэн үздэг хүнтэй би дайралдаа ч үгүй, мэдэх ч үгүй юм.
Миний санахад амьдралын энэ хүнд хэцүү, эмгэнэлт талыг үзэн яддаг энэ үзэл санаа энэ хорсол нь зовлон зүдүүр дэлгэрүүлж алдаршуулахын үүднээс хамгийн чадалтай евангели бичигдсэн бөгөөд залуу үеийнхний нь амьдрал уг чанартаа нэгэн маягийн жижиг сажиг, ердийн явдлуудыг дүүргэн бичсэн номоор эхэлдэг орны хүн, Владимир Ленинийг гоц өргөмжилж байгаа хэрэг. Оросын утга зохиол бол Европын хамгийн гутаж гунигласан утга зохиол юм. Үүнд манай бүх ном идэр залуу ба ид хав насандаа ухаан санаа дутагдсанаас эзэрхэг засгийн дарлалаас, эмэгтэйчүүдээс, хажуу хавийнхнаа хайрладагтаа хорвоогийн бүтэлгүй байгуулалтаас, хөгшин насандаа амьдралыг алдаатай ухамсарласнаас шүд дутмаг, ходоод муугаас, үхэхийн зайлшгүйгээс бид хэрхэн шаналан зүдэрч байгаа тухай нэгэн янзын л сэдэвтэй бичдэг юм.
