Зохиолч: А. П. Чехов
Орчуулагч: Р. Гүрбазар
Ангилал: Оросын уран зохиол
Хэвлэлийн газар: Улсын хэвлэлийн газар
Сахлаа хусаж, сүрлэн бүрх өмссөн, худалдаачин гэхээс илүү түшмэл гэлтэй нүдэндээ шилтэй худалдаачин Иван Иваныч Кузьмичов, урт хормойтой саарал өнгийн олсон даавуу дээл, өргөн хүрээтэй бортого малгай өмсөж, өнгийн даавуугаар оёсон бүс бүсэлсэн, урт үстэй намхан өвгөн, N хотын сүмийн хамба Сирийн Христофор хоёр тэргэнд суужээ. Худалдаачин ямар нэгэн юм хичээнгүйлэн бодож явах ба нойроо сэргээхийн тул толгойгоо үе үе сэгсрэн ажил төрөлд гөлийж дассан хүйтэн төрх, саяхан гэр орныхонтойгоо салах ёс гүйцэтгэн дориун балгасан хүний баяр баясгалан хоёрын хямрал түүний царайд илэрнэ. Хамба лам ус гүйлгэнэсэн нүдээр орчлон дэлхийг гайхан харж нүүр дүүрэн инээмсэглэхэд нь бортого малгайны нь хүрээ хүртэл өртөх шиг болно. Түүний царай улайж даарсан байдалтай үзэгдэнэ. Кузьмичов, Христофор хоёр энэ удаа ноос худалдаалахаар яваа ажээ. Тэр хоёр гэр орны хүмүүстэй салах ёс гүйцэтгэн цөцгийтэй зөөлөн талх идэж хэдийгээр өглөө эрт байсан ч гэсэн дарс зооглоцгоожээ... Хоёулын сэтгэл их тэнэгэр байлаа...
