Зохиолч: Р. Киплинг
Орчуулагч: Ц. Шагдар
Ангилал: Үлгэр, домог Британийн уран зохиол Адал явдалт
Хэвлэлийн газар: Улсын хэвлэлийн газар
Зэрлэг ноходтой тулалдаж, Акела үхсэний дараах хоёр дахь жилд Маугли арван долоон нас хүрчээ. Жаахан л бүгчим халуун болбол ямагт усанд орох, үргэлж хүчтэй хөдлөхийн хажуугаар хамгийн шим тэжээлтэй хоол унд хэрэглэх тул Мауглийн бие бялдар чийрэг, тэнхээ их, арван долоон настай гэшгүй өндөр гоолиг ажээ. Ой модны зэм ажиглах хэрэг тохиолдвол тэр нь нэг гараараа мөчрөөс дүүжигнэн хагас цаг гаруй байж чаддаг ажээ. Түүнчлэн давхиж буй залуу бугыг хөөн гүйцэж, эвэрдэн барьж унагадаг аж. Умар зүгийн намаг газар орших том зэрлэг гахайг ч хөлдөн авч газар саван алж чадна. Жунглийн Амьтад, Мауглийн ухаан санаанаас айдаг байсан бол одоо түүний хүч чадлаас айх болж, Мауглийг хувийн хэргээр, энгийн тайван явж байхад нь ч түүний дөхөж ирж байгаа тухай шивэр авир хийцгээж зам зайлцгаадаг байжээ. Гэсэн ч түүний харц зөөлөн хэвээр үлджээ. Түүний нүд, зодоон хийж буй үед нь ч гэсэн хар ирвэс Багирагийнх шиг галтай хурц болдоггүй. Түүний нүд зөвхөн, энгийн байдгаасаа арай л шийдэмгий, хөдөлгөөнтэй болдог, үүнийг нь Багира хүртэл ойлгож ядан гайхаж байдаг ажээ...
