ЦАХИМ НОМ

Ах дүү Гримм

ЯКУБ ГРИММ (1785—1863)

ВИЛЬГЕЛЬМ ГРИММ (1786—1859)

Ах дүү Якуб, Вильгельм Гримм хоёул германы хэл шинжлэлтэн, аман зохиол судлагчид байв. Тэд Германы утга зохиолын романтик чиглэлийнхний хамгийн дуртай төрөл болох ардын үлгэрийг сурвалжлан цуглуулж түүний үндсэн дээр шинэ шинэ үлгэр зохиодог байв.  Ах дүү хоёр Гриммийн сурвалжлан цуглуулж хэвлэн нийтэлсэн ардын үлгэрүүд нь дэлхий дахинаа алдаршсан юм.

Ах дүү Гримм хоёул Марбургийн их сургууль төгсөж, хуульчийн мэргэжил эзэмшжээ. Хоёул Гёттингений их сургуулийн профессороор ажиллаж байгаад, 1837 онд Ганноверийн ванд тангараг өргөхөөс татгалзсан учир ажлаас халагдсан боловч нөр их хөдөлмөрийнхөө ачаар 1841 оноос Берлин хотын их сургуулийн профессор, Пруссын Шинжлэх ухааны Академийн гишүүн болсон байна.

Ах дүү Гримм нь «Майстергезаны хуучин германы тухай», «Сарнай цэцэг», «Ядуу Генрих» зэрэг дундад зууны германы түүхэн эх бичгүүдийг хэвлүүлж, «Германы баатарлаг үлгэр» гэдэг судалгааны зохиол бичиж, ардын яруу найраг болон дундад зууны германы утга зохиолыг үечлэх талаар судалгааны үнэ цэнтэй бүтээл туурвижээ. Тэд ардын уран бүтээлийг судлахдаа хэл шинжлэлийн бүтээлдээ хэрэглэсэн харьцуулан судлах аргад тулгуурлажээ. Германы аман зохиол болон бусад ард түмний домог үлгэрийг судалж, 1835 онд нийтлүүлсэн Я. Гриммийн «Герман домог үлгэр» зэрэг бүтээл нь аман зохиолын тухай шинжлэх ухаанд том үүрэг гүйцэтгэжээ. Ах дүү Гримм хот тосгоноор хэрэн явж тариачидтай уулзаж ардын үлгэрийг тэмдэглэж авснаа 1812—1818 онуудад «Хүүхдийн болон гэр бүлийн үлгэрүүд», «Герман домог» зэрэг ном болгож хэвлүүлсэн нь зөвхөн германы төдийгүй дэлхийн олон ард түмний хүүхдийн уншлагын санд баттай орсон билээ.

Я. Гриммийн «Герман хэлний түүх», «Герман хэлний зүй» зэрэг бүтээл тухайн хэлний түүхийн судлалд үндэс суурь болсон юм.

Ах дүү Гриммийн үлгэрүүд Ардын хувьсгалын эхэн үеэс манай оронд орчуулагдан бага, дунд сургуулиудын унших бичигт хэвлэгдэж ирсэн бөгөөд 1960-аад онд «Дээжис үлгэрүүд» ном нь гарчээ.

Эх сурвалж: "Хүүхэд залуучуудын нэвтэрхий толь - 3" (1988 он)

Зохиолч (орчуулагч)-ийн номууд