Зохиолч: Э. Успенский
Орчуулагч: Л. ДАШНЯМ
Ангилал: Хүүхдийн уран зохиол Үлгэр, домог Оросын уран зохиол
Хэвлэлийн газар: БНМАУ-ын Ардын боловсролын яамны хэвлэл
Бодвол, хүүхдүүд та нарт хүн бүрд л өөрийн нэгэн хайртай тоглоом байдаг биз. Магадгүй хоёр ч юм уу, бүр тав ч байдаг байж болох юм. Жишээлэхэд, би л лав бага байхдаа гурван тийм хайртай тоглоомтой байсан. Нэг нь Гена гэдэг аварга том резин матар, нөгөө нь Галя гэдэг бяцхан хуванцар хүүхэлдэй, гурав дахь нь Бөмбөрүүш гэдэг эв хавгүй сагсгар амьтан байдаг байлаа. Бөмбөрүүшийг уг нь тоглоомын үйлдвэрт хийсэн боловч даанч муухай хийсэн тул ямар амьтан болохыг нь танихад бэрх байв. Туулай юу, нохой, муур уу, эсвэл австралийн имж ч юм уу, ямар амьтан юм бэ, бүү мэд ээ. Нүд нь шар шувууных шиг томоо гэгчийн шар, толгой нь туулайнх шиг бөөрөнхий, гэтэл сүүл нь богинохон бөгөөд загзайсан сахлаг. Иймэрхүү сүүл уг нь нялх бамбаруушид л байдаг даа.
Манай аав ээж хоёрын хэлж байгаагаар бол Бөмбөрүүш халуун орны ойд байдаг, шинжлэх ухаан нээгээгүй байгаа амьтан гэнэ.
Эхлээд би тэр шинжлэх ухаанд мэдэгдээгүй байгаа Бөмбөрүүшээс жигтэйхэн их айдаг байсан бөгөөд түүнтэй ганцаархнаа нэг өрөөнд үлдэх дургүй байдаг байлаа. Гэвч яваандаа тэр аймшигт амьтандаа дасаж, бүр найз болоод резин матар Гена, хуванцар хүүхэлдэй Галя хоёроосоо ч дутуугүй хайртай болчихсон байв.
Түүнээс хойш олон жил өнгөрчээ. Гэвч би өөрийнхөө бяцхан найз нарыг огтхон ч мартаагүй юм. Түүгээр ч үл барам тэднийхээ тухай бүхэл бүтэн ном биччихсэн минь энэ дээ...
